...أيآدى من نور

لكل شخص من اعماقو كتبلى كلمه قوتنى

لكل انسانه او انسان كلف نفسو واتصل بيا او بعتلى ميل او عبر عن احساسو بكلام رقيق كتبو على مدونتو

لكل انسان حس بيا فى فتره صعبه من حياتى بجد بشكرو من جوايا

لان اى تصرف من التصرفات دى خلق جوايا نور فى ضلمه الوقت الصعب

قوانى ومدلى اديه وشدنى من وحدتى

بجد فى ناس مفكرتش او مجاش على بالى انهم يحسو بيا لقيت اتصال منهم

فجئنى وخلانى اتكسف من ضعفى واد ايه انى عشان الناس دى لازم افوق بئا وابص لاى شعاع نور فى الحياه

اولهم القهوجى اخجلنى بجد من كل اللى عملو عشانى

والجميله انجى اللى اتصلت بيا اكتر من مره

واجمل مفاجاه اتصال مى صاحبه مدونه نفسى التى رحلت

وامانى (لمحات) الللى كتبت بوست مخصوص عشانى وبصراحه كلامها اخجلنى بجد

واى انسان كتب تعليق ليا

انا اسفه انى بعيد تانى انى اشكر الناس الى حسستنى اد ايه انهم بيحبونى من غير اى هدف فى الحياه معرفونيش ولا انا عرفتهم بس احساسهم لمسنى اوى

كل الايدين اللى اتمدتلى مش ناسيه حبهم ليا

كتر خيركو بجد

...............

اما عن كل اللى قالو عنى انى مازوشيه

انا مش مازوخيه ولا بهوى تعذيب ذاتى

انا الحمد لله طول عمرى قويه وعمرى ما ضعفت ادام حد

بس يمكن الكتابه بتبين كتير من ضعف الانسان

هو سوء حظى ان الفتره دى كان فيها ضغوط كتير

اخبار وحشه كتيره

وقعت زى ما اى حد ممكن يقع

كتبت عشان افرغ شحنه

مكنش قصدى اشيل حد همى

او انى اتسول الحنيه من حد

لا عمرى ولا هكون اللى استجدى عطف اشخاص

طول عمرى قويه بس وقعتى بتقسمنى وبرجع احسن ما كنت

واكثر شراسه وعند مع الحياه

لكل اللى دايقهم فضفضتى لكل اللى سخر من احساسى وصرختى

انا مش مازوشيه زى ما قال البعض او ضعيفه

انا من الاساس لما عملت الصفحه دى عملتها لتكون مساحه اصرخ فيها

وقت تعبى وضيق الحياه عليا ووقت احساسى بالحب ووقت لكل شىء بحسو

فمكنتش بحسب اى حساب ان يوم هيجى يكونلى صرخه واحس ان صرختى بتئلم غيرى

وبرغم من انها صفحتى الشخصيه

الا انى هلتزم الصراخ فى اعماقى زى طول عمرى ومحدش يشوف الا الوجه القوى الوجه المصمت الاصم

بكرر اسفى للى تعبتهم معايا وشاركونى بمشاعرهم الرقيقه

واسفه لكل من ازعجته كلماتى لم اتعمد

...............

انا الحمد لله كويسه جدا دلوقتى

فتره ضعف وانتهت

ولن تتكرر

ان شاء الله